सोन्याची साखळी लुटली अन् भरचौकात केली जातीवाचक शिवीगाळ...
मंगळवेढा /प्रतिनिधी :-
मंगळवेढा तालुक्यातील मल्लेवाडी येथे एका धक्कादायक घटनेत, पोलीस पाटलांना तिघांनी मिळून बेदम मारहाण करत जातीवाचक शिवीगाळ केली.याप्रकरणी मंगळवेढा पोलीस ठाण्यात अनुसूचित जाती-जमाती अत्याचार प्रतिबंधक कायद्यासह (अॅट्रॉसिटी) चोरी आणि मारहाणीचे विविध कलमान्वये गुन्हा दाखल करण्यात आला आहे.
पोलीस सूत्रांकडून मिळालेल्या माहितीनुसार, मल्लेवाडीचे पोलीस पाटील आनंद आप्पासो रायबाण (वय ४०) हे काल बुधवार, दि.१ एप्रिल २०२६ रोजी सकाळी ९.३० च्या सुमारास गावातील मुख्य चौकात होते.
यावेळी आरोपी विनायक पाटील, शुभम सोलनकर आणि अजिल माळी (सर्व रा.मल्लेवाडी) यांनी त्यांना घेरले. “तू आमची बदनामी करतोस आणि लोकांजवळ आम्हाला शिवीगाळ करतोस,”असा बनाव रचून आरोपींनी वादाला सुरुवात केली.
सोन्याची साखळी पळवून काठ्यांनी मारहाण
वादाचे रूपांतर लवकरच हिंसेत झाले. आरोपींनी पोलीस पाटील आनंद रायबाण यांना हातापायाने मारहाण करण्यास सुरुवात केली.
यावेळी शुभम सोलनकर याने आनंद रायबाण यांच्या गळ्यातील एक तोळ्याची सोन्याची साखळी बळजबरीने हिसकावून घेतली. त्यानंतर तिन्ही आरोपींनी हातात काठ्या घेऊन ‘तुला बघून घेतो’ असे म्हणत त्यांच्या पाठीवर, हातावर आणि पायावर जबर मुक्कामार दिला.
जातीवाचक शिवीगाळ आणि जीवे मारण्याची धमकी :-
फिर्यादी आनंद रायबाण हे चर्मकार समाजाचे आहेत हे माहित असतानाही, आरोपींनी त्यांना उद्देशून अत्यंत खालच्या पातळीवर जाऊन जातीवाचक शिवीगाळ केली. तसेच वाळू उपशाच्या संदर्भात “आम्ही वाळू काढू किंवा काहीही करू, तुझा काय संबंध?” असे म्हणत आरोपींनी त्यांना जिवे मारण्याची धमकी दिली.
पोलीस कारवाई :-
या गंभीर प्रकारानंतर आनंद रायबाण यांनी मंगळवेढा पोलीस ठाण्यात धाव घेऊन तक्रार नोंदवली. पोलिसांनी याप्रकरणी :- भारतीय न्याय संहिता (BNS): कलम ११८(१), ११९(१), ११५(२), ३५२, ३५१(२)(३), ३(५)
अॅट्रॉसिटी कायदा: ३(१)(r), ३(१)(s), ३(२)(va) यानुसार गुन्हा दाखल केला आहे.
या प्रकरणाचा पुढील तपास उपविभागीय पोलीस अधिकारी डॉ.बसवराज शिवपुजे हे स्वतः करत आहेत. पोलीस पाटलांसारख्या जबाबदार पदावरील व्यक्तीवर अशा प्रकारे हल्ला झाल्याने मल्लेवाडी गावात तणावाचे वातावरण झाले आहे.
