मंगळवेढा / प्रतिनिधी :-
मंगळवेढा तालुक्यातील दुष्काळी भागातील पाटखळ या गावांमध्ये जागतिक चिमणी दिनानिमित्त दि.20 मार्च रोजी मंगळवेढा तालुका पत्रकार संघाच्या वतीने पक्षाच्या पाणपोईचे उद्घाटन करण्यात आले.पिण्यासाठी पाणी मिळत नसल्यामुळे पक्ष्यांचे मोठ्या प्रमाणावर स्थलांतर होत आहे.पाटखळ व परिसरात विविध पक्षी मोठ्या प्रमाणावर वास्तव्य करतात.या पक्ष्यांवर पाण्यासाठी भटकंती करण्याची वेळ येऊ नये म्हणून पाणपोईची संकल्पना राबवली असल्याचे प्रतिपादन मंगळवेढा तालुका पत्रकार संघाचे अध्यक्ष भीमराव मोरे यांनी सांगितले.
पुढे बोलताना भिमराव मोरे म्हणाले की, जागतिक चिमणी दिन 20 मार्च हा दिवस जागतिक चिमणी दिन म्हणून पाळला जातो.पहिला जागतिक चिमणी दिवस हा २० मार्च २०१० रोजी साजरा करण्यात आला.आज चिमण्यांची संख्या कमी होत चालली आहे. खरं म्हणजे भारतात सगळीकडे सर्वात जास्त संख्येने सापडणारा, विणीचा हंगाम वर्षभर असू शकणारा, माणसाच्या जवळपास राहणारा आणि त्यामुळे नेहमी दिसणारा पक्षी अशी चिमणीची ओळख आहे.परंतु दिवसेंदिवस होत चालल्या बदलामुळे आता चिमण्यांच्या वास्तव्याला धोका निर्माण झाला आहे. यासाठी जागरूकता निर्माण करण्यासाठी २० मार्च हा दिवस ‘जागतिक चिमणी दिवस’ म्हणून साजरा केला जातोय.या निमित्तानेच आज उन्हाळ्यात चिमण्यांच्या संरक्षणासाठी मंगळवेढा पत्रकार संघाच्या वतीने पक्षांच्या पाणपोईचे उद्घाटन करण्यात आले असल्याचेही शेवटी मोरे यांनी सांगितले.
