१ लाख ६ हजार ५०० रुपयांचा मुद्देमाल लंपास; मंगळवेढा पोलिसांत गुन्हा दाखल; पोलिस तपास सुरू...
मंगळवेढा / प्रतिनिधी :-
मंगळवेढा शहरातील दामाजी नगर परिसरात रात्रीच्या अंधारात तीन अज्ञात चोरट्यांनी एका महिलेच्या घरी धाडसी हल्ला करून घरफोडी केली आहे.
चोरट्यांनी धारधार चाकूचा धाक दाखवून फिर्यादी महिलेला व तिच्या मुलाला धमकावत फिर्यादीच्या गळ्यातील मंगळसूत्रासह कपाटातील सोन्याचे-चांदीचे दागिने व रोख रक्कम असा एकूण १ लाख ६ हजार ५०० रुपयांचा मुद्देमाल लुटला असून याप्रकरणी मंगळवेढा पोलीस ठाण्यात गुन्हे क्रमांक १६८/२०२५ अंतर्गत दाखल झाली असून, बीएनएस कलम ३०९ (४) व ३(५) प्रमाणे नोंद करण्यात आली आहे.
फिर्यादी अश्विनी राजेंद्र हजारे (वय ३२ वर्षे, मजूर, रा.कारखाना रोड, दामाजी नगर, ता. मंगळवेढा) यांनी दिलेल्या फिर्यादीनुसार ही घटना १७ मार्च २०२६ रोजी रात्री २:०० ते २:१५ वाजता घडली आहे
ही घटना रात्री २ वाजता घडली तेव्हा अश्विनी आणि त्यांचा मुलगा शिवाजी घरी झोपलेले होते. अचानक किचनच्या दरवाज्यावर धडधडाट झाला आणि बाहेरून जोराने ढकलल्यामुळे आतून बंद असलेला दरवाजा उघडला गेला.चोरट्यांनी कडी-कोयंडा तोडून घरात शिरकाव केला. तीन अनोळखी आरोपी एकमेकांना संगनमताने आले होते. पण नेमके चेहरे ओळखता आले नाहीत.
चोरट्यांनी अश्विनी व शिवाजीला जागृत करून धारधार चाकूसारखे शस्त्र दाखवले. शांत राहा, आवाज करू नका अन्यथा जीव घेऊ अशी धमकी देत त्यांनी लूट सुरू केली.प्रथम आश्विनी यांच्या गळ्यातील मंगळसूत्र काढले. ते ९ ग्रॅम वजनाचे सोन्याचे असून त्यात ४ मोठे आणि ६० छोटे मणी होते.
त्यानंतर कपाट उघडून त्यातील ३ ग्रॅम सोन्याचे कानटॉप्स, १ ग्रॅम सोन्याचे कानखडे व १५ ग्रॅम चांदीची जुडवी काढली. याशिवाय कपाटातून ३,५०० रुपये रोख रक्कम लुटली, जी ५०० व १०० रुपयांच्या नोटांमध्ये होती. त्यानंतर चोरटे उत्तर दिशेने ३ किमी अंतरावर गायब झाले.
सदरची ही घटना मंगळवेढा शहरातील दामाजी नगर परिसरात घडली, जो कारखाना रोडजवळील शांत वस्ती आहे.कारखाना रोड हे मंगळवेढा तालुक्यातील व्यावसायिक क्षेत्र असून दामाजी नगर हे मध्यमवर्गीय कुटुंबे राहणारे ठिकाण आहे. रात्रीच्या वेळी अशी धाडसी चोरी होणे हे स्थानिकांसाठी धक्कादायक आहे.
मागील काही महिन्यांत मंगळवेढा परिसरात चोरीच्या घटना वाढल्या आहेत. पोलिसांना स्थानिक गुंडगिरीचा संशय आहे.फिर्याद आल्यावर पोलीस उपनिरीक्षक नागेश बनकर यांनी तात्काळ गुन्हा दाखल केला असून अधिक तपास पोलीस निरीक्षक दत्तात्रय बोरीगिड्डे यांच्या आदेशाने मंगळवेढा पोलिस करीत आहेत.
