मृतदेह पडक्या घरात खोलीत दोन दिवस ठेवला नवीन गॅस कनेक्शन, पेट्रोल पंपावरुन डिझेल खरेदी
मंगळवेढा /प्रतिनिधी :-
मंगळवेढ तालुक्यातीला पाटकळ येथील दीर-भावजयांनी कट रचून अनोळखी महिलेचा खून केला आणि ती भावजयच असल्याचे भासविल्याप्रकरणी आरोपी प्रियकर निशांत सावत व प्रेयसी किरण सावत यांनी रचलेल्या कटानुसार घराजवळच असलेल्या कडब्याच्या गंजीत जाळण्यासाठी मतिमंद महिलेला ११ जुलै रोजी पंढरपूर येथून दुचाकीवरून पाटखळ येथे आणल्याचे सीसीटीव्ही फुटेजवरून चौकशीत उघड झाले आहे.
आरोपी निशांत सावत याने रात्री पाटकळ येथे आणून तिचा हाताने गळा दाबून खून करून घटनास्थळापासून १५० मीटर अंतरावर असणाऱ्या एका पडक्या घरात खोलीत दोन दिवस मृतदेह लपवून ठेवला असल्याचेही पोलिस तपासात उघड झाले आहे. ही महिला गोपाळपूर येथील रहिवासी असल्याचे स्पष्ट झाले आहे.
पोलिसांच्या माहितीनुसार, निशांत सावत हा सातारा जिल्ह्यातील कराड येथील एका ज्वेलरी शॉपमध्ये कामाला होता. मात्र, त्याचे वहिनी किरणसोबत मागील काही महिन्यांपासून प्रेमसंबंध होते.त्यामुळे २० ते २५ दिवसांपूर्वी तो किरणला कायमचेच घेऊन जायचे म्हणून गावी आला होता. त्या दोघांनीही कुटुंबासह पोलिसांना चकवा देण्यासाठी हा भयंकर कट रचला होता.
आरोपी निशांतने महिलेचा खून करून पडक्या खोलीत लपवलेला मृतदेह १४ जुलै रोजी रात्री २ वाजता चादरीत गुंडाळून आणून घराजवळील रचलेल्या कडब्याच्या गंजीत टाकला व त्यावर किरण चा मोबाइल ठेवून गंज पेटवली.किरणने आत्महत्या केल्याचीही अफवा पसरवली. पोलिसांना मात्र या घटनेबद्दल संशय होता. त्यांनी किरणच्या मोबाइलचा सायबर टीमकडून “सीडीआर” काढला. त्यानंतर निशांतच्या मोबाइलमधील किरणचे फोटो पाहून खात्री झाली आणि सत्य समोर आले.
महिलेला पेटवण्यासाठी निशांत याने २ हजाराचे डिझेल आणले. तत्पूर्वी निशांत याने मंगळवेढा येथील एका गॅस एजन्सीमधून एक नवीन गॅस व शेगडी विकत घेतली. यातील गॅस सिलिंडर टाकी त्या पडक्या खोलीत घरात ठेवल्याचे पोलिस तपासात समोर आले आहे.
यातील केवळ शेगडी मात्र घरी नेली होती, त्यावेळी घरच्यांनी फक्त नवीन शेगडी कशी काय आणली, सिलिंडर कुठे आहे, अशी विचारणा केली असता मला शेगडी लकी ड्रॉ मध्ये लागल्याचे सांगितले.
सीसीटीव्ही फुटेजवरून जळीत महिलेचा तपास
सदर जळीत महिलेला ११ जुलै रोजी दुचाकीवरून पंढरपूर येथून निशांत याने आणल्याचे सीसीटीव्ही फुटेजवरून स्पष्ट झाले आहे. सदर महिलेचे फोटो नातेवाइकांना दाखवून ओळख पटवणे शक्य होईल.
- दत्तात्रय बोरीगिड्डे, पोलिस निरीक्षक, मंगळवेढा पोलिस ठाणे
