मंगळवेढा/प्रतिनिधी-
स्व.महादेवराव बाबुराव आवताडे प्रतिष्ठानच्या वतीने इयत्ता १० वी व १२ वी बोर्ड परीक्षेत घवघवीत यश संपादन करून प्रथम, द्वितीय व तृतीय क्रमांक प्राप्त करणाऱ्या मंगळवेढा तालुक्यातील गुणवंतांचा मतदारसंघाचे आमदार समाधान आवताडे यांच्या प्रमुख उपस्थितीमध्ये गुरुवार, दिनांक १३ जून २०२४ रोजी दुपारी १.१५ वाजता जोगेश्वरी मंगल कार्यालय मंगळवेढा येथे सन्मान सोहळा व मार्गदर्शन शिबीर कार्यक्रम आयोजित करण्यात आल्याची माहिती प्रतिष्ठानचे संचालक पै.दादासाहेब ओमणे यांनी दिली आहे.
सदर कार्यक्रमासाठी माजी अतिरिक्त मुख्य कार्यकारी अधिकारी तथा सुप्रसिद्ध व्याख्याते डॉ. इंद्रजीत देशमुख हे प्रमुख मार्गदर्शक म्हणून उपस्थित राहून उपस्थित गुणवंत विद्यार्थ्यांना आणि पालकांना मार्गदर्शन करणार आहेत. तसेच प्रांताधिकारी बी आर माळी, पोलीस उपविभागीय अधिकारी विक्रांत गायकवाड, पोलीस निरीक्षक रणजित माने, तहसीलदार मदन जाधव, माध्यमिक शिक्षणाधिकारी सचिन जगताप, प्राथमिक शिक्षणाधिकारी कादर शेख, नगरपरिषद मुख्याधिकारी चरण कोल्हे, पंचायत समिती गटविकास अधिकारी योगेश कदम, शिक्षण विभाग गटशिक्षणधिकारी बिभिषण रणदिवे, यांच्या प्रमुख उपस्थिती लाभणार आहे. गेल्या अनेक वर्षांपासून मतदारसंघातील सामाजिक, सांप्रदायिक, शैक्षणिक व सांस्कृतिक कार्यक्रमांच्या माध्यमातून या प्रतिष्ठानने अनेक कार्यक्रम राबवून सामाजिक बांधिलकी जपण्याचा प्रयत्न केला आहे. गुणवंत विद्यार्थ्यांना प्रतिष्ठानच्या वतीने शैक्षणिक साहित्य, प्रशस्तीपत्रक व ट्रॉफी अशा स्वरूपामध्ये सन्मानित केले जाणार आहे.
तरी वरील मंगळवेढा कार्यक्रमासाठी तालुक्यातील सर्वच शाळा कॉलेजचे संस्था पदाधिकारी, प्राचार्य मुख्याध्यापक, पर्यवेक्षक, शिक्षक, गुणवंत विद्यार्थ्यांनी व पालकांनी उपस्थित राहण्याचे आवाहन स्व.महादेवराव बाबुराव आवताडे प्रतिष्ठानच्या सर्व पदाधिकाऱ्यांनी केले आहे.
